मिति २०७९ वैशाख ३० गते सम्पन्न स्थानीय तह निर्वाचनको माध्यमबाट गुराँस गाउँपालिका-८, नम्बर वडा दैलेखमा हामीले जनप्रतिनिधिको जिम्मेवारी प्राप्त गरेको पहिलो ‘एक वर्ष’ पूरा भएको सुखद् अवसरमा सबै मतदाताहरूमा धेरै-धेरै धन्यवाद व्यक्त गर्दछु ।
यस गुराँस गाउँपालिका-८, नम्बर वडामा हामी (वडा अध्यक्षमा दीपेन्द्र ओली, सदस्यहरुमा थामबहादुर खत्री, महेश खत्री, लक्ष्मि बि. क. र विष्णु बस्नेत) लाई प्राप्त मतको आधारमा मिति २०७९ जेठ ४ गते परिणाम घोषणा भएको थियो भने, यस वडामा हामिले जेठ १० गते कार्यभार सम्हालेका हौँ । हुन त पहिलो एक वर्षमै सबै अपेक्षाकृत विकास निर्माणको कार्यमा पूर्ण रुपमा उपलब्धि हाँसिल गर्न त गाह्रो हुन्छ । यद्यपी, शुरु गरिएका योजना, निरन्तरता दिइएका र हाँसिल गरिएका केहि उपलब्धिहरू यहाँ प्रस्तुत गरेका छौँ ।
| विषयगत क्षेत्र | भएका कार्यहरू | कैफियत |
| आर्थिक विकास | १) कृषक र कृर्षि समूह तथा व्यावसायिक कृषकहरुलाई मल, विऊलगायतमा आंशिक अनुदान एवं परामर्श गरिएको ।
२) व्यावसायिक फार्महरूलाई दर्ता प्रक्रियामा प्रोत्साहित गरि राज्यको दायरामा ल्याइएको । ३) व्यावसायिक तथा उद्यमशीलता सम्बन्धि तालिम सञ्चालन गरि व्यवसायमा प्रोत्साहन गरिएको । ४) वर्षौँ देखि बाँझो रहेका जग्गालाई खेतीयोग्य जमिनमा रुपान्तरणको लागि कार्य शुरुवात् भएको । |
कृषि, पर्यटन, उद्योग तथा वाणिज्य, सहकारी, वित्तीय क्षेत्र |
| सामाजिक विकास | १) दुईवटा गाउँघर क्लिनिक भवन (गर्चा र मकुट्क) निर्माण कार्य चलिरहेको ।
२) सबै आधारभूत विद्यालयमा नि:शुल्क इन्टरनेट जडान र सञ्चालन । ३) सबै विद्यालय व्यवस्थापन समितिलाई काम, कर्तव्य र अधिकार सम्बन्धि अभिमुखिकरण गरिएको । ४) महिला सञ्जाल र महिला स्वास्थ्य स्वयं सेविकालाई प्रविधिको प्रयोग र दुरूपयोग सम्बन्धि अभिमुखिकरण गरिएको । ५) आधारभूत स्वास्थ्य सेवा केन्द्र धरमपोखरामा हट्लाइन फोन सेवा सञ्चालन गरी चौविसै घण्टा आकस्मिक स्वास्थ्य सेवा र परामर्श लागू गरिएको । ६) सबै सामुदायिक विद्यालय प्राङ्गण अध्यारोमुक्त गरिएको । ७) ‘घर-घरमा धारा, गुराँस सरकारको अभिभारा’ अनुरुप यस वडाका ५२ घरधुरीमा निजी धारा निर्माण तथा सञ्चालन भएको । बाँकी घरधुरी र स्रोतमा सर्भेक्षणको काम चल्दै । ८) गैरसरकारी संस्थाहरूसँगको साझेदारीमा सबै विद्यालयमा बालमैत्री धारा निर्माण र सञ्चालन भइसकेको । |
शिक्षा, स्वास्थ्य, खानेपानी तथा सरसफाई, लैङ्गिक समानता तथा सामाजिक समावेशीकरण क्षेत्र |
| पूर्वाधार विकास | १) वडाभर ८ किलोमिटरभन्दा बढी नयाँ सडक ट्याक खोलिएको ।
२) सबै सडकमा बाह्रै महिना गाडि चलाउन मिल्नेगरि स्तरोन्नतिको काम जारी रहेको । ३) कृषि र कृषक समूहमार्फत तीनवटा सिञ्चाई पोखरी निर्माण र सिञ्चाई सामग्री हस्तान्तरण गरि ५६ घरधुरीका कृषक लाभान्वित भएका । पात्ले टोलका २१ घरमा निजी सिञ्चाई पोखरी निर्माणको काम अन्तिम चरणमा पुगेको । ४) माथिल्ला सरकार र साझेदारसँगको सहकार्यमा दुइवटा विद्यालय भवन एकैसाथ निर्माण कार्य चलिरहेको । ५) प्रहरी चौकी, लालिकाँडाको प्रशासनिक भवनको लागि सहजिकरण गरि निर्माणको काम शुरुवात । ६) विद्यालयहरूमा पक्की घेरबारको लागि नीति अख्तियार गरि निर्माणको क्रम अघि बढेको । |
सडक, सिंचाई, भवन तथा सहरी विकास, उर्जा, लघु तथा साना जलविद्युत, सञ्चार जस्ता क्षेत्र |
| वन, वातावरण तथा विपद् व्यवस्थापन | १) वडास्तरीय विपद् व्यवस्थापन समिति गठन गरी क्रियाशील गरिएको ।
२) सामुदायिक वन उपभोक्ता समितिसँगको समन्वयमा वन संरक्षण कार्य व्यवस्थित गरिएको र वृक्षरोपणलाई प्रोत्साहन गरिएको । ३) जलउपयोग गुरुयोजना निर्माणको काम अघि बढेको । ४) भु-उपयोग क्षेत्र वर्गीकरण र मापदण्ड सम्बन्धि मस्यौदा तयार भई कार्य अघि बढेको । |
वन तथा भू–संरक्षण, जलवायु परिवर्तन, विपद् व्यवस्थापन क्षेत्र |
| संस्थागत विकास, सेवा प्रवाह र सुशासन | १) सार्वजनिक सेवाको गुणस्तरीयताको लागि पहिलो पटक वडास्तरमा सार्वजनिक सुनुवाई भएको ।
२) सबै योजनाको सामाजिक परीक्षणलाई अनिवार्य गरिएको । ३) वडाको आफ्नै प्रशासकीय भवन निर्माण पूर्णता दिई कार्य सञ्चालन । ४) पहिलो पटक नागरिक वडापत्र तयार गरी लागू गरिएको । ५) व्यक्तिगत घटना दर्ताको काम अनलाइन प्रणालीमा रुपान्तरण गरिएको । ई-हाँजिरी लागू गरिएको । ६) सुचना प्रवाह प्रभावकारी बनाउन सामाजिक सञ्जालहरूको अधिकतम् प्रयोग गरिएको । ७) बैङ्कसम्म पुग्न नसक्नेको लागि वडा कार्यालय र वडा कार्यालयसम्म पनि पुग्न नसक्नेलाई घरमै सामाजिक सुरक्षा भत्ता पुर्याइएको । ८) बालमैत्री स्थानीय शासन भएको वडा घोषणा गरि लागू गरिएको । ९) योजनाहरूको अनुगमन तथा सुपरीवेक्षण कार्यलाई थप प्रभावकारी बनाइएको । |
मानव संसाधन, संस्थागत क्षमता, राजस्व परिचालन, सार्वजनिक सुनुवाई, सामाजिक परीक्षण, बेरुजु फछ्र्यौट, सेवा प्रवाहका मापदण्ड, विद्युतीय सूचना प्रविधि, अन्तरनिकाय समन्वय क्षेत्र |
यी विभिन्न उपलब्धि हाँसिल हुनुमा सबै राजनीतिक दल, सामाजिक क्षेत्रमा क्रियाशील निकाय तथा व्यक्तिहरु, कर्मचारी वर्ग, आम नागरिक सबैको महत्त्वपूर्ण योगदान रहेको हुँदा यसको लागि धन्यवाद ज्ञापन गर्दछौँ । आगामी दिनमा समेत योजना तथा कार्यक्रमहरु कार्यान्वयनमा हातेमालो र एकताको आवश्यकता महसुस गरेका छौँ । निर्वाचनको दौरानमा व्यक्त गरिएका प्रतिवद्धताहरू,‘समृद्ध नेपाल-सुखी नेपाली’को राष्ट्रिय आकांक्षा र ‘सुख, समृद्धिको लागि शासकीय सुधार, हातेमालो गरी फेरौँ गुराँसको मुहार’ को नारा साकार पार्न आफ्ना योजना र क्रियाकलाप अघि सार्ने अठोट गर्दछु ।
धन्यवाद !
………………………
दीपेन्द्र ओली
वडा अध्यक्ष
मिति: २०८०/०२/०४
सचिवालय । ४ जेष्ठ २०८०, बिहीबार ०७:०३